শিহৰণকাৰী বর্ণনা :নিমাতিঘাটত ‘ মোৰ চকুৰ সন্মুখতে সকলো ঘটনা ঘটি গ’ল, কিন্তু মই একো কৰিব নোৱাৰিলোঁ ‘।

আজিৰ খবৰ, যোৰহাট, ৯ ছেপ্টেম্বৰ : ভয়াৱহ ফেৰী দুর্ঘটনাত কিদৰে ব্রহ্মপুত্রৰ বুকুত প্ৰাণ হেৰুৱাব লগীয়া হ’ল এগৰাকী প্ৰবক্তাই । কেনেকৈ চকুৰ সন্মুখতে নাওখন ডুব গৈছিল । ফেৰীখনৰ পৰা কিদৰে ব্রহ্মপুত্রৰ বুকুত পৰীমিতা নামৰ প্ৰবক্তা গৰাকী ডুব গৈছিল, শিহৰণকাৰী বর্ণনা কৰিলে পৰিমিতাৰ লগত থকা সহযাত্রী ক্লিডাপ টাৰোপীয়ে৷ ক্লিডাপে জনোৱা মতে ফেৰীখন দুর্ঘটনাত পতিত হোৱাৰ সময়ত পাৰঘাটতে আছিল পৰীমিতাৰ মাতৃ৷ আঠখেলীয়া নামঘৰত কন্যা পৰীমিতা আৰু তেওঁৰ বান্ধৱী ক্লিডাপ টাৰোপীৰ সৈতে বুধবাৰে সেৱা লৈছিল মাতৃয়ে৷ ইয়াৰ পাছতে গুৱাহাটীলৈ উভতি অহাৰ কথা আছিল পৰীমিতাৰ মাতৃ৷ কিন্তু উভতি অহাৰ পূর্বে কন্যা আৰু তেওঁৰ বান্ধৱীক বিদায় জনাবলৈ নিমাতীঘাটলৈ গৈছিল মাতৃগৰাকী৷ সংবাদ মাধ্যমৰ আগত পৰীমিতাৰ মাতৃয়ে এইদৰে কয়– ‘মই সমগ্র ঘটনা নিজ চকুৰেই দেখিছোঁ৷ সিহঁত ফেৰীত উঠাৰ পাছত পৰীমিতাৰ হাতত পানীৰ বটলটো দি মই উভতিবলৈ লৈছিলোঁ৷ ঠিক কেইমুহূর্তমানৰ পাছতে প্রচণ্ড এটা শব্দ শুনি মই ঘূৰি চাই দেখিছিলোঁ তাই যোৱা ফেৰীখনে আনখন ফেৰীত প্রচণ্ড জোৰে খুন্দা মাৰিছে৷ মই চিঞৰি চিঞৰি যাত্রীসকলক উদ্ধাৰ কৰিবলৈ আহ্বান জনাইছিলোঁ৷ মোৰ চকুৰ সন্মুখতে সকলো ঘটনা ঘটি গ’ল, কিন্তু মই একো কৰিব নোৱাৰিলোঁ৷ মোৰ সৰুজনী ছোৱালীৰ অসম লোকসেৱা আয়োগৰ পৰীক্ষা থকা বাবে মই তাইক এৰি গুৱাহাটীলৈ যোৱাৰ কথা আছিল৷ কাইলৈৰ পৰা মহাবিদ্যালয়ৰ ক্লাছ কৰিব লাগিব বুলি পৰীমিতাই মোক এৰি মাজুলীলৈ ৰাওনা হৈছিল৷ ৰঙাচাহী মহাবিদ্যালয়ৰ শিক্ষা বিভাগৰ সহকাৰী অধ্যাপক তথা তেওঁলোকৰ সৈতে থকা ক্লিডাপ টাৰোপীয়ে প্রকাশ কৰা অনুসৰি পাৰঘাটৰ পৰা মাতৃয়ে নাও ডুব যোৱাৰ ঘটনা স্বচক্ষে প্রত্যক্ষ কৰি আছিল৷ কিন্তু অসহায় মাতৃগৰাকীয়ে কন্যাক বচাবলৈ সেই মুহূর্তত কোনো ব্যৱস্থা ল’ব পৰা নাছিল৷ চিঞৰি চিঞৰি পাৰঘাটত থকা আন লোকসকলক নিজৰ কন্যাক বচাবলৈ আহ্বান জনাইছিল যদিও মাতৃৰ সন্মুখতে ব্রহ্মপুত্রৰ বুকুত ডুব গৈ প্রাণ হেৰুৱাবলগীয়া হ’ল অসমীয়া বিভাগৰ সহকাৰী অধ্যাপক পৰীমিতা দাসে৷ কিমান মৰ্মান্তিক আছিল এই দুৰ্ঘটনা । মাজুলীবাসীৰ মৰমক ঢাল কৰি বহু নেতাই নিজৰ সাত পুৰুষলৈকে সম্পত্তি গোটালে। কিন্তু মাজুলীবাসীয়ে পালে কি ? প্ৰতিবাদৰ পাছত প্ৰতিবাদ কৰা হ’ল যদিও আজি পৰ্যন্ত দলং হৈ নুঠিল ।পৃথিৱীৰ বৃহত্তম নদীদ্বীপটোক এখন দলংৰে সংযোজিত কৰিবলৈ কোনো এখন চৰকাৰ সমৰ্থ নহ’ল। যাৰ বাবে এই ভয়ংকৰ দুৰ্ঘটনাটো সংঘটিত হ’ল । বছৰ বছৰ ধৰি ৰাজনীতিবিদ তথা বিভাগীয় কৰ্তৃপক্ষৰ হেতালিৰ বাবেই বুকুৰ আপোনজনক হেৰুৱাবলগীয়া হল । কাৰোবাৰ যদি পুত্ৰ কন্যা, কোনোবাই আকৌ স্বামী পত্নীক হেৰুৱালে। সকলোৰে এতিয়া এটাই দাবী শীঘ্ৰে নদীদ্বীপটোক দুয়োপিনৰ পৰা দলঙেৰে সংযোজিত কৰক আৰু মাজুলীৰ বান সমস্যাৰ এটা স্থায়ী সমাধান উলিয়াওক।