কৃষি বিজ্ঞান কেন্দ্ৰৰ উদ্যোগত বিশ্ব খাদ্য দিৱস উদযাপন
আজিৰ খবৰ, গুৱাহাটী, ১৬ অক্টোবৰ: কামৰূপ গ্ৰাম্য ৰ বৰিহাট গাঁৱত অসম কৃষি বিশ্ববিদ্যালয়ৰ অধীনত কাঁহিকুছিৰ কামৰূপ কৃষি বিজ্ঞান কেন্দ্রৰ উদ্যোগত আৰু মূৰব্বী ড° ধীৰেন কলিতাৰ সহযোগত বিশ্ব খাদ্য দিৱস উপলক্ষে এটি আলোচনাচক্র আয়োজন কৰা হয়। পথাৰ শস্য বিশেষজ্ঞ ৰিজৱানুল হেলিমে আঁত ধৰি এই অনুষ্ঠানটিত উদ্ধোধনী ভাষণ আগবঢ়ায় আৰু এই দিনৰ তাৎপর্য বৰ্ণনা কৰে। আলোচনাটিত সমল ব্যক্তি হিচাপে উপস্থিত থাকি মুম্বাইস্থিত এগৰাকী ফ্ৰিলান্স সামাজিক গৱেষণা পৰামৰ্শদাতা শ্ৰীমতী ময়ুৰী ৰাজবংশীয়ে খাদ্য সুৰক্ষা, পুষ্টিহীনতা আৰু ইয়াৰ কাৰণ, মহিলা আৰু শিশুৰ বাবে স্বাস্থ্যকৰ আহাৰ আৰু কেঁচুৱাৰ বাবে কিছুমান কম ব্যয়ৰ পুষ্টিকৰ ব্যঞ্জন প্ৰস্তুত কৰিব পাৰোঁ তাৰ দিশ সমূহৰ ওপৰত ভাষণ প্ৰদান কৰে। এই আলোচনাত উপস্থিত আছিল এই অঞ্চলৰ কৃষি সম্প্ৰসাৰণ সহায়ক মোহিতোচ দাস আৰু আঞ্চলিক পঞ্চায়ত সদস্য নবনিতা চৌধুৰী কলিতা। এই অনুষ্ঠানত ৫০ জনৰো অধিক কৃষক আৰু মহিলা উপস্থিত আছিল। এই বিশেষ দিনৰ লগত সঙ্গতি ৰাখি উপস্থিত ৰাইজৰ মাজত উন্নত জাতৰ লাওৰ বীজ বিতৰণ কৰা হয়।