বৰঝাৰ বিমানবন্দৰত ৰক্ষা বন্ধন উদযাপন

আজিৰ খবৰ, গুৱাহাটী , ৫ আগষ্ট, ২০২২ : ইতিহাসে ঢুকি পোৱা সময়ৰে পৰা ভাৰতীয় জনজীৱনত ভাতৃ – ভগ্নীৰ পবিত্ৰ সম্পৰ্কৰ সাক্ষী হিচাপে ৰক্ষা বন্ধনে এক গুৰুত্বপূৰ্ণ ভূমিকা গ্ৰহণ কৰি আহিছে । এগৰাকী ভাতৃক হাতত ৰাখী পিন্ধাই ভগ্নীয়ে ভগৱানৰ ওচৰত ভাতৃৰ মংগল কামনা কৰি প্ৰাৰ্থনা কৰা , ভাতৃয়েও ভগ্নীক যিকোনো বিপদ বিঘিনীত ৰক্ষা কৰাৰ অংগীকাৰ কৰা আদি বিষয়ে ভাৰতীয় জনজীৱনত প্ৰভাৱ পেলায় আহিছে । বিশেষকৈ হিন্দু ধৰ্মত পবিত্ৰ মাহ হিচাপে পৰিগণিত হৈ অহা শাওঁন মাহৰ পূৰ্ণিমা তিথিৰ প্ৰাকক্ষণত পৰম্পৰা অনুসৰি ৰক্ষা বন্ধন উৎসৱ পালন কৰি অহা হৈছে । আনহাতে গুৱাহাটীৰ বৰঝাৰস্থিত লোকপ্ৰিয় গোপীনাথ বৰদলৈ আন্তৰ্জাতিক বিমানবন্দৰ চৌহদৰ আদানী গ্রুপৰ কাৰ্যালয়ৰ সভাগৃহত আজি জি আই এ এলৰ উদ্যোগত আৰু ব্ৰহ্মকুমাৰীৰ সহযোগত ৰক্ষা বন্ধন উদযাপন কৰা হয় । এই উপলক্ষে জি আই এ এলৰ মানৱ সম্পদ বিকাশ শাখাৰ কাৰ্যবাহী অৰ্ণব চাংমাই আঁত ধৰা অনুষ্ঠানত বি কে ৰাকেশ ভাইয়ে ৰক্ষা বন্ধনৰ তাৎপৰ্য দাঙি ধৰি ধ্যান , আত্মা , জীৱন আদিৰ ওপৰত তত্বগধুৰ বাখ্যা আগবঢ়ায় । আনহাতে অনুষ্ঠানত বি কে শাৰদা বহন , বি কে সুপতা বহনকে ধৰি ব্ৰহ্মকুমাৰীৰ কেবাজনো কৰ্মকর্তা , ভাৰতীয় বিমানবন্দৰ প্ৰাধিকৰণৰ উত্তৰ পূব মণ্ডলৰ ক্ষেত্ৰীয় কাৰ্যবাহী সঞ্চালক সন্মুখ যুগানি , বৰঝাৰ বিমানবন্দৰৰ মুখ্য বিমানকোঠ বিষয়া উৎপল বৰুৱা , বৰঝাৰ বিমানবন্দৰৰ নিৰাপত্তাৰ দায়িত্বত থকা চি আই এছ এফ ইউনিটৰ কমাণ্ডেণ্ট লালমোহন ঠাকুৰ , জি আই এ এল আৰু আদানী গ্রুপৰ কেবাজনো বিষয়া উপস্থিত থাকে । শেষত শলাগৰ শৰাই আগবঢ়াই আদানী গ্রুপৰ জনসম্পৰ্কৰক্ষী বিষয়া ৰুমা দেৱীয়ে । আনহাতে ব্ৰহ্মকুমাৰীৰ ফালৰ পৰা ক্ষেত্ৰীয় কাৰ্যবাহী সঞ্চালক সন্মুখ যুগানি আৰু মুখ্য বিমানকোঠ বিষয়া উৎপল বৰুৱাক হাতত ৰাখী পিন্ধোৱাই ৰক্ষা বন্ধনৰ কাৰ্যসূচীৰ শুভাৰম্ভ কৰা হয় । উল্লেখযোগ্য যে কাৰ্যসূচীত বৰঝাৰ বিমানবন্দৰত বিভিন্ন বিভাগত কৰ্মৰত ১৫০ ৰো অধিক বিষয়া – কৰ্মচাৰী উপস্থিত থাকে আৰু ব্ৰহ্মকুমাৰীৰ ফালৰ পৰা সকলোকে মংগল কামনা কৰি হাতত ৰাখী পিন্ধোৱা হয় ।