আজিৰ খবৰ,২৮ জুলাই : কবিতা বুলিলে সাধাৰণতে এখন মুখ চকুৰ আগলৈ ভাঁহি আহে । বিশেষকৈ আধুনিক অসমীয়া কবিতাৰ ক্ষেত্ৰত কবিতাৰ কথা পাতিলে বা কবিতাৰ নাম ললেই মনত পৰে সেই স্বনামধন্য ব্যক্তি গৰাকীলৈ । সম্পূৰ্ণ মানুহজনেই যেন শব্দৰে গঢ়া এটি ধুনীয়া কবিতা । অসমতেই নহয় পৃথিৱী বিয়পি থকা তেখেতৰ কৰ্মৰাজিয়ে এচাম মানুহক শব্দৰ এখন মনোৰম জগতলৈ লৈ যায়। শব্দৰ সৈতে কথা পাতি ভাল পোৱা মানুহ জনে ছবি আৰু গান ভাল পাইছিল । বুকুত শব্দৰ টোপোলা লৈ দিহিঙে দিপাঙে ঘূৰি ফুৰা মানুহজনক বেয়া পোৱা মানুহ হয়তো কমেই ওলাব ৷ আজি তেখেতৰ ওপজা দিন ৷ হয়, আজি কবি হীৰেণ ভট্টাচাৰ্যৰ জন্ম দিন ৷ হীৰুদা নামেৰে বিখ্যাত হৈ পৰা বৰেণ্য কবি গৰাকীৰ ১৯৩২ চনত যোৰহাটত জন্ম হৈছিল ৷ অসমীয়া কবিতা প্ৰেমীৰ বাবে তেওঁৰ পৰিচিত নাম আছিল ‘হীৰুদা’৷ “প্ৰেম আৰু ৰ’দালিৰ কবি” উপাধিৰে বিভূষিত কৰা হৈছিল হীৰেন ভট্টাচাৰ্যক ৷ হীৰেণ ভট্টাচাৰ্যৰ প্ৰথম কবিতাৰ প্ৰকাশ হয় ১৯৫৭ চনত ৷ ১৯৭২ চনত তেওঁৰ প্ৰথম কবিতা পুথিৰ সংকলন ‘মোৰ দেশ মোৰ প্ৰেমৰ কবিতা’ প্ৰকাশ হয় ৷।বিভিন্ন দিনৰ কবিতা’, ‘কবিতাৰ ৰ’দ’, ‘তোমাৰ গান , ‘মোৰ প্ৰিয় বৰ্ণমালা’, ‘ভালপোৱাৰ বোকা মাটি’ আদি কৈ শেষ কৰিব নোৱাৰা অনেক কবিতা তেখেতৰ অনন্য সৃষ্টি ৷ ইয়াৰ বাহিৰেও তেওঁ শিশুৰ বাবে ১৯৯১ চনত ‘ল’ৰা ধেমালি’ আৰু ‘অকন ধেমালি’ প্ৰকাশ কৰে ৷ ‘অসমীয়া সাহিত্য জগতলৈ আগবঢ়োৱা অনবদ্য অৱদানৰ বাবে তেখেতক কেইবাটাও বঁটাৰে সন্মানিত কৰা হৈছে ৷ হীৰেন ভট্টাচাৰ্যই লাভ বঁটা অথবা সন্মান সমূহৰ ভিতৰত অন্যতম চোভিয়েট দেশ নেহৰু বঁটা, সাহিত্য অকাডেমি বঁটা, অসম উপত্যকা সাহিত্য বঁটা ইত্যাদি ৷ ২০১২ চনৰ ৪ জুলাইত আমাৰ মাজৰ পৰা বিদায় মাগে সকলোৰে আদৰৰ হীৰু দাই ৷ কিন্তু আজিও প্ৰতিগৰাকী সাহিত্যানুৰাগীয়ে শ্ৰদ্ধাৰে সুঁৱৰি আহিছে হীৰু দাৰ কৰ্মৰাজিক । সুগন্ধি পখিলা খ্যাত সকলোৰে মৰমৰ হীৰুদাৰ আজি জন্ম দিনত সাহিত্যনুৰাগী সকলোয়ে জনাইছে শুভেচ্ছা । বাস্তৱত তেওঁ নাই যদিও চিৰদিন চিৰকাল সকলোৰে মনত অমৰ হৈ থাকক …ৰ’দালিৰ কবি হীৰুদাৰ জন্মদিনত আমিও শ্ৰদ্ধাৰে সুঁৱৰিছো…